TALLAR LAXMMI BOMB TA KAFA TARIHI

byHaiman Raees -
0

TALLAR LAXMMI BOMB TA KAFA TARIHI 

Izuwa yanzu dai duk inda ka duba a shafukan yanar gizo babu labarin da ya fi jan hankali a harkar fina-finan Indiya sama da sabuwar tallar shirin jarumi Akshay Kumar da ta fita a jiya juma'a mai suna Laxmmi Bomb. Tarihi ya kafu, kuma mutane sun sha mamaki cikin kofuna bayan tallar ta haΙ—a jimillar makallata miliyan saba'in (70 Million Views) a cikin awoyi ashirin da huΙ—u bayan fitar tallar. Hakan ya sa ta zama talla mafi kalluwa daga cikin tallolin fina-finan Indiya baki Ι—aya. Sai dai abin tambayar shi ne? Wani saΖ™o wannan fim ke Ι—auke da shi? Kuma menene 'yan kallo za su tsammata daga wannan fim? Ga wasu abubuwa da zan iya tsakurowa daga cikin tallar wannan shiri. 

 1. FIM ƊIN AKSHAY KUMAR NE: Wanda duk ya san wanene jarumi Akshay Kumar to baya buΖ™atar sai an yi masa dogon sharhi akan abinda jarumin zai iya yi a fim. Ko da yake wannan fim ya zo da wata sabuwar siga da ba a taΙ“a ganin jarumin a cikinta ba, babu shakka shirin na Ι—auke da duk wani abu da masoyan jarumin ke so dangane da shi. 
 
 2. HAƊI NA MUSAMMAN: Wannan shiri shi ne fim na farko da jarumi Akshay Kumar zai fito tare da tsaleliyar kyakkywar jarumar nan mai tashe wato Kiara Advani. Hakan ya jawo hankalin mutane da dama duba da irin ganiyar nasara da kowannensu ke ciki a yanzu tare kuma da tunanin abin da zai ka iya fitowa daga gare su idan suka haΙ—u a fim tare. Kuma kamar yadda tallar ta nuna, haΙ—in zai bada citta har da masoro. 
 
3. FIRGICI DA BAN TSORO: Fim Ι—in Laxmmi Bomb fim ne na ban tsoro, don haka 'yan kallo sai su shirya. Domin kuwa mun gano jarumi Akshay Kumar yayin da fatalwar wata mace ta shiga cikinsa inda kafin ka ce kwabo ya canja daga mai barkwanci zuwa masheΖ™i. 

 4. NISHAƊI: Bisa ga dukkan alamu wannan shiri na Laxmmi Bomb ya shirya tsaf domin tabbatar wa da duniya laΖ™abin nan da aka kiran jarumi Akshay Kumar da shi wato Mr. Khiladi. Domin kuwa tallar Laxmmi Bomb ta nuna mana irin nishaΙ—in da za a samu a cikin shirin musamman ta fuskar barkwanci. 

 5. TARIN KODUMO: Duba da irin yadda wannan talla ta samu karΙ“uwa, na san ko ba a faΙ—a ba za ku iya fahimtar gamsarwar da ke cikinta. Akwai SuburbuΙ—a, calikanci, soyayya, waΖ™a mai daΙ—i, ban tsoro, madarar kafce da kuma sunΖ™i-sunΖ™in buhunan kodumo! 

Tabbas alamu sun nuna za ta fashe sosai a bikin diwalin bana. Shin ko Akshay Kumar zai zama sabon sarkin Diwali da Laxmmi Bomb kamar yadda yanzu ya zama sabon sarkin Bollywood? Lokaci ne zai bamu wannan amsar. 

©️✍🏻
 Jamilu Abdulrahaman
   (Mr. Writer) 
Haimanraees@gmail.com

πŸ’« *AKKIANS NA ALFAHARI DA KU* πŸ’«

 
Tags:
Post a Comment (0)