UBAN GIDA NA
Aminu Ladan Abubakar Alan Waƙa
Uban gida na da zaka ɗauki zance na, Aradu Allaah da ka haye hasashena x2
In banda bautar zuciya da bata tserarwa,
Ya za na tara abincin da bani cinyewa?
Ya za na gina gida wanda ba shi ɗorewa?
Ya za na tara Tufafin da bani sanyawa?
Ya za na dasa hasashen da ba shi ɗorewa?
Ya za na shimfiɗa daula da bata ɗorewa?
Ya za na ɗaura majanyin da za ya suncewa?
Uban gida na da zaka ɗauki zance na, da kayi gyara kafin a gincire kwana...
Uban gida na da zaka ɗauki zance na, Aradu Allaah da ka haye hasashena
Iyye... In banda bautar zuciya da ke halakarwa,
Abin hawa na ya zarce na hawan kowa
Rigar sakawa ta zarce ta jikin kowa
Gami da takalma sun fi na ƙafar kowa
Dangi agogona ya fuce na gun kowa
Daidai da zobena yafi hasashen kowa
Hatta da birona alƙalam na zanawa
Uban gida na da zaka ɗauki zance na, wallahi da an gyara da tsakiyar rana...
Uban gida na da zaka ɗauki zance na, Aradu Allaah da ka haye hasashena
Hmm... Gida dubu na gina tanadin wajen kwana
Ciki da falo dubbai daban-daban ɗana
Don tanadi na talauci da ke tsumin rana
Sannan in kaucewa idanduna da ke bina
In ɓadda sawayena ga masu biko na
An ɗauki duniya mai tabbata gidan kwana
Gida ga mai burin rayuwa gidan ƙuna
Ya mai gida na da zaka duba zance na, wallahi Allaah da ka cikan Muradina..
Uban gida na da zaka ɗauki zance na, Aradu Allaah da ka haye hasashena
Iyye... Mun zama bayi na ciki da ba shi turewa
Muna haƙa ya na mai rijiya da babu ruwa
Muna nutsewa ƙasa zuciya tana ƙwawa
Muna ta bautar gangar jikinmu ba ƙiwa
Muna biye al'aura muna Tsiyacewa
Giya ta rai ta sanya mu ƙara ruɗewa
Ina tunani da sani da ke a ƙwaƙwalwa?
Uwargidana da kin fahimci zance na, wallahi Allaah da an rufe tunanina...
Uban gida na da zaka ɗauki zance na, Aradu Allaah da ka haye hasashena
Ni zuciyata kuma ta hanani yin barci
Dare da rana kuma ba ragi na sassauci
Tana ta kakabi ko abinci bata ci
Cikinta mamaki ya game ta ga ƙunci
Sannan tunani yayi tarnaƙi gadon barci
Ina ta mamaki kan hali na zalunci
Baƙin maciji da ake kira da Kumurci
Uban gida na bisa ƙarƙashin tunanina, ya fi mu jin gantsar nasa a tunanina...
Uban gida na da zaka ɗauki zance na, Aradu Allaah da ka haye hasashena
Duk inda ka ga ƙasa country a Ilimina
To arzikin da buwayi ya basu dangina
Ya zarce dukka buƙatu nasu da an tona
Sai dai idan jagoransu ya zamo ɓauna
Sai babu adalci gunsu shugabannina
Idan da adalci babu mai shiga rana
Kowansu ya zarce wajibinsa dangina
Ya shugabana in an nazar a zance na, wallahi Allaah Ya tseratar da mu ƙuna...
Uban gida na da zaka ɗauki zance na, Aradu Allaah da ka haye hasashena
Hannunka mai sanda yau nake iyayena
Nuni da Nishaɗi ne nake wa babana
Yau gyara kayanka ba shi maida mu rana
Ya shugabana in har ka ɗauki zance na
Abinda ka tara ka aje gidan kwana
Da wanda ka yi bushasha kake tsumin ƙauna
To wanda ka bayar za shi yayi ma rana
Uban gida na in yanzu kaga laifi na, ai zaka gane ran tsai da mu cikin rana...
Uban gida na da zaka ɗauki zance na, Aradu Allaah da ka haye hasashena
Ku taimaka mini gun dakatar da kuka na
Don kar na ƙarar da ruwan cikin idanuna
Suna da rana a gaba zubar hawaye na
Wai shin ko ruhi da jiki da hankali ɗana
Sun yarda ranar tsayuwa tana tsumin kwana?
Wai shin ko labari na wuta da Aljannah
Anya bani adama ya aminta ko ɗana?
Ya shugabana da ka amince zance na, me za ya ruɗe ka da handama tsakar rana...
Ubangijina Afuwar Ka ni nake nema....
Ubangijina gafarar Ka ni nake nema
Ubangijina Afuwar Ka mu muke nema
Ubangijina sauƙin Ka ne abin nema
Ubangijina Rahamar Ka mu muke nema
Ubangijina gafarar Ka mu muke nema
Ubangijina Ceton Ka mu muke nema...
Uban gida na da zaka ɗauki zance na, Aradu Allaah da ka haye hasashena X2