RUBUTACCIYAR WAƘAR UMMINA 2

RUBUTACCIYAR WAƘAR UMMINA 2

Waƙa: Ummina 2

Mawaƙi: Aminu Ladan Abubakar Alan Waƙa 

Ummi ye Ummi Momina

Ummi ye Ummi Momina

Ummi ye Ummi Momina

Ummi ye Ummi Momina

Jallallah kai ne ka ce a bi iyaye

Ummarni ga tajdidi 'ya'ye

Iyaye ba ai yi musu tawaye

Nasiha za na yiwo kaina tsaye

Ya Allah sanya kar ai mun tawaye.

Ummi ye Ummi Momina

Ummi ye Ummi Momina

Rayuwa a duniya abar tsoro ce ummina

Kyakkyawan asali a waiwayi tsatso ummina

Labarin hankali sai a dubi kamala ummina

Labarin nutsuwa a dubi natija ummina

Halayyar ɗan adam naƙaltar hali ummina

Labarin soyayya tana ga iyaye momina.

Ummi ye Ummi Momina

Ummi ye Ummi Momina 

Maza share hawaye ki daina kuka ummi momina 

Labarin duniya a je ga fatake ummina

Labarin zuciya sai a tambayi fuska ummina

Labarin kududdufi a je ga agwagwa ummina

Ai hulɗar arziƙi da tunanin kirki dangina

Labarin ƙuruciya a je gun yara dangina.

Ummi ye Ummi Momina

Ummi ye Ummi Momina 

Farinciki mai sa a yi kuka da hawaye

Farar uwa alfamar renon 'ya'yaye

Nishaɗuwa mai sa a ji kukan tsuntsaye

Adon gani ai ado da tagullar hannaye

Farin dare mai sanya zumuɗin angwaye.

Ummi ye Ummi Momina

Ummi ye Ummi Momina

Baƙin hali mai sa a yi bore tawaye

Baƙin ciki sa 'ya'ya mata su yi maye

Baƙar uwa mai sanya takaici da hawaye

Baƙin dare alfarma ce gun kuraye

Baƙin naɗi mai ɓoye kamannin buzaye.

Ummi ye Ummi Momina

Ummi ye Ummi Momina

Maza share hawaye ki daina kuka Ummi momina 

Cuta yau gobe cuta ba mutuwa ba momina

Cuta mai waraka ta zamo kaffara momina

Cuta mara magani a cika da sa'ada momina

Kyakkyawan tanadi ke ƙarkon ƙarshe momina

Allah sa a cika da imani da salama momina.

Ummi ye Ummi Momina

Ummi ye Ummi Momina

Burina addu'a gami da biyayya mai haiba

Haƙuri da ki kai da ni ni Aminu ba zan manta ba

Renon da ki kai mana ba zai yiwu a ce mun rama ba

Addu'ar da ki kai mani ba za fa ta faɗi a ƙasa ba

Allah ya biya maki da ƙarkon ƙarshe da na rabba

Maza share hawaye ki daina kuka ba farau ne ba.

Ummi ye Ummi Momina

Ummi ye Ummi Momina

Tsakar dare rigar sanyawar mugwaye

Wutar ciki mai sanya nadama da tsumaye

Azarɓaɓi mai sa katsalandan kai waye

Jirin cida mai sanya kurame waiwaye

Hassada mai kore nagartar kowaye.

Ummi ye Ummi Momina

Ummi ye Ummi Momina

Ragon amo waƙa da ɗabi'ar ɓeraye

Ragon salo waƙe da salon 'yan nanaye

Ragon maza goga mai dukan mataye

Abin gudu malam da ɗabi'un bokaye

Ruwan dare guɗa a gidajen angwaye

Ummi ye Ummi Momina

Ummi ye Ummi Momina