WAƘAR FAUZIYYA D. SULAIMAN

JINJINA DA YABO GAREKI, BISA AIYUKKA NA JINƘAI, 

ALLAH ƘARA RIƘO DA HANNUNKI FAUZIYYA D. SULAIMAN. 

Ya mafi iya saka khairi,

Ka yi sakamakonKa tari,

Kariya daga dukka sharri,

Ɗaukaka da rufin asiri,

Ƙara yi wa Fauziyyar nan.

Allah Baiwarka ga ta,

Fauziyyar Marubuta,

Mai jinƙan mabuƙata, da

Garkuwar yara da mata,

Inuwa ta shiga su huta,

Yi jibintar lamuranta,

Har ma da gidauniyarta,

Ƙarfafa guiwa gareta,

Yi daɗin buɗi, wadata,

Ƙara yauƙaƙa arziƙinta,

Daɗa tsarkake zuciyarta,

Ya Allah Ka tsare ta,

Ga duk sharrin magauta,

Da shiga komar macuta,

Kar sui nasara a gun ta

Janye sheɗanu jikinta,

Ka tsaya mata kai-da-fata,

A cikin duk lamuranta,

Masu son su ga tawayarta,

Ko ɓacin ayyukanta,

Kar sui nasara a kan ta,

Yi daɗin shiriya a gunta,

Ta fi ƙarfin zuciyarta,

Darajarta ka ɗaukakata,

Ƙara albarka gareta,

Kyawun ƙarshe Ka bata,

Da shahada ɗauki ranta,

Aljanna ciki ka sa ta,

Ka yi jinƙan walidanta,

Albarkaci zuri'arta,

Bayanta ka kyautata ta,

Daɗa kyakkyawar fahimta,

Da uban 'ya'ya mijinta,

So da ƙauna ka daɗe ta,

Da biyayyar Annabinta,

Don isar mulkinKa Amin.