MIJI NAGARI 01

( MIJI NAGARI 01. )

4th/Muharram/1443AH-13th/August/2021

1. Miji na gari shi ne mutum mai

ilimin addini kuma yake

kwatanta aiki da iliminsa kuma

ga shi da ɗabi’u masu kyau.

Lallai babu shakka wanda duk

Allah Yayi masa baiwar haɗa

waɗannan siffofi da ɗabi’u, Allah

Yayi masa babbar kyauta, kuma

wannan shi ne ake ƙira miji

nagari.

2. Miji nagari shi ne wanda ya haɗa

wasu siffofi guda goma (10)

waɗanda Allaah Rabbul Izza ya ambata

a cikin sura ta 33 aya ta 35 inda

Allaah (S.W.T.) Ya ambaci maza da mata

nagari. Kuma shi ne wanda

manzon Allaah (S.A.W.) da kansa

yace idan ya nemi mace da

nufin aure to lallai a bashi.

Domin hana irin waɗannan

mazaje aure a lokacin da suka

nema na iya sa iyayen yarinyar

da ita kanta yarinyar su faɗa a

cikin wata irin fitina da kuma

ɓarna a bayan kasa, haka

fiyayyen halitta Annabin rahma

(S.A.W.) ya faɗa acikin ma’anar

hadisinsa ingantacce.

Abin lura a cikin wannan

Magana ta manzon Allaah (S.A.W)

shi ne mutum baya zama nagari

saboda tarin iliminsa kawai

amma babu ɗabi’a, haka kuma

mutum baya zama nagari

saboda kyawawan ɗabi’unsa

kawai amma babu ilimi mai

amfani. Wanda kawai yake zama

nagari shi ne wanda ya hada

wadannan abubuwa guda biyu,

wato ilimin da ake aiki dashi da

kuma kyawawan ɗabi’u.

3. Wata hanya ta gaba kuma na

gane mutum nagari itace wajen

alkhairinsa ga iyalansa da kuma

yawan kyautata musu. A wani

hadisi manzon Allaah (S.A.W) yace:

mafi alkahirinku shi ne mafi

alkahiri ga iyalansa, kuma nine

mafi alkhairinku ga iyalaina”.

4. Miji nagari shi ne mai

kyautata ma matansa mai

tausayinsu mai girmama iyayen

matansa.

5. Miji nagari shi ne kuma mai

kulawa da haƙƙokinsu da Allah

Ya ɗora akansa gwargwadon

ikonsa.

6. Miji nagari shi ne kuma mai yalwata

kuɗin cefane dana kwalliya

domin a sami abinci mai daɗi

kuma ta samu kuɗin gyara masa

jikinta.

7. Miji nagari shi ne wanda yake

yabawa da kwalliyar da matarsa

ke yi masa, kuma yake yabon

abincinta a duk sanda yaci. Idan

kuma an sami wani kuskure

wajen dafa masa abincin, to

yakan sanar da matarsa a cikin

hikima da lafazi mai daɗi.

8. Miji nagari shine mai ƙoƙarin danne zuciyarsa yayinda iyalinsa taimasa laifi, kuma baya yiwa matarsa fada a gaban yaranta gudun karsu rainata.

9. Miji nagari shine mai kishin

matarsa, domin manzon Allah

SAW yace: Duk mutumin da

baya kishin matarsa ba zai shiga

aljanna ba.

10. Miji nagari shi ne

wanda yake son matarsa bayan

ya aureta fiye da yanda yake

sonta kafin ya aureta, shi ne

wanda son matarsa baya fita a

zuciyarsa har bayan mutuwarta.

Domin manzon Allah (S.A.W) an

kawo masa sarkar Nana

Khadijah bayan rasuwarta, yana

ganin sarkar sai kawai aka ga

hawaye na zubowa a fuskarsa,

sai yace an tunamasa da

matarsa Khadijah, saboda

tsananin son da yake mata.

Allaah Yahaɗamu da mata nagari, suma kuma yahaɗasu da mazaje nagari, Aameen Yaa Rabbissamaawaati.

Zamuci Gaba Inshaa Allaah.

Daga Ɗan uwanku a Musulunci,

(Ustadh_Abulfawzhaan)